វេទិកាធុរកិច្ចសហគមន៍កសិកម្ម ស្តីពី ការលើកកម្ពស់សហគ្រិន ភាពកសិកម្ម ដើម្បីគាំទ្រដល់ ភាពលូតលាស់ ប្រកបដោយចីរភាពនៃសហគមន៍កសិកម្ម

នៅថ្ងៃទី ១៦ ខែធ្នូ ឆ្នាំ ២០២១ ខាំបូដ្រា/CamboDHRRA បានសម្របសម្រួលរៀបចំ វេទិកាធុរកិច្ចសហគមន៍កសិកម្ម ស្តីពី ការលើកកម្ពស់សហគ្រិនភាពកសិកម្មដើម្បីគាំទ្រដល់ភាពលូតលាស់ ប្រកបដោយចីរភាពនៃសហគមន៍កសិកម្ម ក្រោមអធិបតីភាពលោក គង់ ភាជ ប្រធាន នាយកដ្ឋានកសិឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ លោកស្រី ថាយ បូណេ នាយិកាប្រចាំប្រទេស អង្គការ Finn Church Aid (ហ្វ៊ីនឈើចអេដ) លោកឧកញ៉ា ហង់ សុគន្ធ ប្រធានក្រុមប្រឹក្សាភិបាលសម្ព័ន្ធសហ គមន៍កសិកម្មកម្ពុជា លោកស្រី Kristen Rasmussen (គ្រឹស្ទាន) នាយកប្រចាំប្រទេស អង្គការជំនួយព្រះវិហារ ដាណឺម៉ាក (DCA) និង លោកស្រីឃួន សី ប្រធានក្រុមប្រឹក្សាភិបាលសមាគមបណ្តាញកសិករ និងធម្មជាតិ លោក ប៉ាន សុភាព ប្រធានក្រុមប្រឹក្សាភិបាល សមាគមខាំបូដ្រា និងជានាយកប្រតិបត្តិសមាគមបណ្តាញកសិករ និងធម្មជាតិ និងអញ្ជើញចូលរួមជាតំណាងមកពីរដ្ឋាភិបាល អង្គការសង្គមស៊ីវិល ក្រុមហ៊ុនឯកជន និង គណៈកម្មការ និងសមាជិកសហគមន៍កសិកម្មជាច្រើននាក់ ក្នុងនោះអ្នកចូលរួមសរុបរួមមានចំនួន ១២០នាក់ (ស្រី ៤០នាក់) ។ វេទិកាធុរកិច្ចនេះធ្វើឡើងក្នុងគោលបំណង៖
– ដើម្បីរៀនសូត្រ និងចែករំលែកការអនុវត្តល្អៗ និងបញ្ហាប្រឈមក្នុងការគ្រប់គ្រងធុរកិច្ចរបស់សហគមន៍កសិកម្ម
– ដើម្បីពង្រឹងភាពជាអ្នកដឹកនាំ និងការគ្រប់គ្រងធុរកិច្ចរបស់សហគមន៍កសិកម្ម
– ដើម្បីលើកកម្ពស់បរិយាប័ន្ននៃភាពជាដៃគូសាធារណៈ ឯកជន និងសហគមន៍កសិកម្ម (4Ps) ដើម្បីគាំទ្រដល់ភាពលូតលាស់របស់សហគមន៍កសិកម្ម
ផ្អែកលើដំណើរការ និងលទ្ធផលដូចមាន រៀបរាប់ខាងលើ ថ្វិត្បិតវេទិកានេះទើបនឹងរៀបចំជាលើក ដំបូង ប៉ុន្តែអាចនិយាយបានថា វេទិកានេះ បានប្រព្រឹត្តទៅយ៉ាងរលូន និងទទួលបានផ្លែផ្កាដូចអ្វីដែលបាន គ្រោងទុក៖
– អ្នកចូលរួមបានគ្រប់ចំនួននឹងការរំពឹងទុក
– សមាសភាពនៃអ្នកពាក់ពន្ធ័ធុរកិច្ចហសគមន៍កសិកម្ម បានបង្ហាញវត្តមានក្នុងវេទិកា
– មានការចូលរួមយ៉ាងសកម្មពីអ្នកចូលរួមក្នុងការពិភាក្សាក្រុម និងចោទជាសំនួរចំៗ
– វាគ្មិនបានធ្វើការពន្យល់ចំៗ និងធ្វើការបកស្រាយចំងល់ច្បាស់ល្អ
– អ្នកចូលរួមបានទទួលនូវពត៌មានពាក់ពន្ធ័នឹងធុរកិច្ចសហគមន៍ពីវេទិកានេះ (ឧទា. កិច្ចសន្យា កសិកម្ម)ទាំងម្ចាស់ជំនួយនិងដៃគូអភិវឌ្ឍន៍ និងអ្នកចូលរួម បានផ្តល់ការស្វាគមន៍ និងមានទំនាក់ទំនង យ៉ាងកក់ក្តៅជាមួយគ្នា៕