សិក្ខាសាលាស្តីអំពីការកំណត់សមត្ថភាព សម្រាប់ “ការពង្រឹងសមត្ថភាពយុវជន ដើម្បីអនុវត្តន៍ និងទទួលបានផល​ប្រយោជន៍​ពីការវិនិយោគកសិកម្ម​ប្រកបដោយការទទួលខុសត្រូវ នៅកម្ពុជា”

ថ្ងៃពុធ ១៣កើត ខែអស្សុជ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី៣០ ខែកញ្ញា​ ឆ្នាំ២០២០
ក្រោមកិច្ចសហការរវាង​ អង្គការ​អាស៊ាដ្រា និងអង្គការស្បៀង និងកសិកម្មនៃអង្គការសហប្រជាជាតិ (FAO) សមាគមខាំបូដ្រា និងសមាគមបណ្តាញកសិករនិងធម្មជាតិ​ សហការជាមួយ វេទិកា អង្គការមិនមែនរដ្ឋាភិបាលស្តីពីកម្ពុជា និងអង្គការភាពជាដៃគូដើម្បីចីរភាពកសិកម្មកម្ពុជា រៀបចំសិក្ខា ស្តីអំពីការកំណត់ពីសមត្ថភាពរបស់យុវជន​ក្នុង​​ការអនុត្តន៍ និងទទួលបានផលប្រយោជន៏ពីការវិនិយោគ កសិកម្ម ប្រកបដោយការទទូលខុសត្រូវនៅ​កម្ពុជា​ ក្នុងគោលបំណងដើម្បី៖
– ស្វែងយល់អំពីក្របខណ្ឌគោលនយោបាយថ្នាក់សកល និងថ្នាក់តំបន់​ ស្តីពីការវិនិយោគកសិកម្មប្រកប​ដោយ​ការទទួលខុសត្រូវ និង
– កំណត់ពីសមត្ថភាព និងតំរូវការចាំបាច់សម្រាប់កសិករវ័យក្មេង កសិករខ្នាតតូច និងយុវសហគ្រិន ក្នុងការអនុវត្ត និងទទូលបានផលប្រយោជន៏ពីការវិនិយោគក្នុងវិស័យ. កសិកម្ម និងប្រព័ន្ធស្បៀងអាហារ។
សិក្ខាសាលារៀបចំឡើងក្រោមអធិបតីភាពរបស់ លោកបណ្ឌិត​ ជា សាំងដូណា ប្រធាននាយកដ្ឋានអភិវឌ្ឍន៍សហគមន៍កសិកម្ម ជាតំណាងឯកឧត្តមបណ្ឌិត ងិយ ឆាយ ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋានកសិកម្ម និង លោក គង់ ភាជ ប្រធាននាយកដ្ឋានកសិ ឧស្សាកម្ម នៃក្រសួងកសិកម្ម រុក្ខាប្រមាញ់ និងនេសាទ។ សិក្ខាកាមដែលអញ្ជើញចូលរួមក្នុងសិក្ខាសាលានេះ មានចំនួន ៣៥នាក់ (ស្រ្តី ១០នាក់)​ រួមមាន តំណាងអង្គការកសិករ អង្គការក្រៅរដ្ឋាភិបាល ក្រុមហ៊ុនឯកជន បណ្តាញយុវជន សហគ្រិនកសិកម្មវ័យក្មេង សាកលវិទ្យាល័យ និងអ្នកពាក់ព័ន្ធដទៃទៀត។​
ជាលទ្ធផល អ្នកចូលរួមបានយល់ដឹងអំពីគោលការណ៍ណែនាំសកល (CFS-RAI) ​និងតំបន់(AGRAI) ស្តីពីការវិនិយោគកសិកម្មប្រកប​ដោយ​ការ​ទទួល​​ខុសត្រូវ។ សមត្ថភាព និងតំរូវការសំខាន់ៗរបស់កសិករវ័យក្មេង​ កសិករខ្នាតតូច ​និងកសិកម្មសហគ្រិន​ ​ទាក់ទងនឹងការវិនិយោគកសិកម្មប្រកបដោយការទទួលខុសត្រូវត្រូវបានកំណត់ តាយៈការប្រើប្រាស់ឧបករណ៍វាយតម្លៃសមត្ថភាពឆាប់រហ័ស។ សិក្ខាកាមក៏បានឯកភាពគ្នាបង្កើតជាវេទិកា ឬកិច្ចសហប្រតិបត្តិការ ដែលមានការចូលរួមជាបុគ្គល ឬជាអង្គការ ស្ថាប័ន ដែលចាប់អារម្មណ៍ក្នុងកិច្ចសន្ទនាអំពី RAI (សម្រាប់យុវជន) នៅក្នុងប្រទេសកម្ពុជា និងបានរៀបចំផែនការអនុវត្តសកម្មភាពរួមគ្នា ។